دعونا نستعرض بعضاً من أشعار نضال الحاج :<br><br>هيا .. حورية المطرة!!<br><br>نضال حسن الحاج<br><br>مخير الله.. لا شالت مطرة الخير ولا من الوجع صبت<br><br>ولا كتل الضلام حسك ولا ريح الكلام هبت<br><br>محل ما تنورق الحمى ومحل حيل الصبر ما انبت<br><br>محل تبدأ القصيدة البوح تكون بت القصيدة أبت<br><br>شهور والجتة فاقدة الروح تساسق بين ظنون الموت<br><br>وموجوع البحر ساكت بحنس لا لسان لا صوت<br><br>خبارو وكت رقد فرحك ممدد في الغنا ومختوت<br><br>ولا غنيتي للجاتك<br><br>ولا عزيتي في الفاتك<br><br>خبارك يعني عاد لامتين تحنسي في السكات ينضم<br><br>عشان يترجا كم أستاذ بعد كتبنو الفاتك<br><br>خبارك لونك اتدفق على وجع النحيب تابوت<br><br>خبارك لا لسان لا صوت<br><br>مواويل تايهة<br><br>لا ارتاحت خطاك لا جفت الأحزان ولا ربت على كتفك جناك لا جاك<br><br>خبارك صاحية آخر الليل ومالو الليل دا ما حجاك<br><br>ومالو أكان براح الكون مرق من فجتو وفجاك<br><br>خبارك ضايقة في وشك وساعات الفضا الفايقة<br><br>وخبارك ضقتي ما قبال أكان الدنيا جت بتجيك وكت تشكي وتكون ضايقة<br><br>خبارك ساكتة لا بتنوحي لا بتبوحي<br><br>لا بتوحي لا بتزحي<br><br>مالك ويعرفولك كيف وصمتك ساوا ليكي حجاب وبيهو الناس تقول رايقة<br><br>وقميص الروح وخيل الهم دا هسي لحدي وين سايقة؟<br><br>خلاص اتمدد الأذان<br><br>خلاص شبع القلب أحزان<br><br>أمرقي عشان ولاد الغنوة ماتوا جاعوا وشبعوا وجعة وذل<br><br>أمرقي عشان تجي القمرة وعشان يغشى النهارات ضل<br><br>أمرقي عسى القصيده تجي وعسى الجوع الهرد كبدة سنيني العجفا يلقى تكل<br><br>أمرقي ومدي إيد الحن وقول لي ها الجفا المالك مفاتيح قولنا هاكا أكل<br><br>ولا كلت ولا ملت<br><br>ولا مرقت ولا قالت<br><br>ولا بين البيوت فلت<br><br>ولا بن ناسا اتعالت<br><br>ولا رغم النويح طلت<br><br>ولا ختت ولا شالت<br><br>ولا فرحة هواك طلت<br><br>ولا دمعة شقاك سالت<br><br>ولا زالت<br><br>حزن منشري ضد النيل<br><br>تسابق في نهار الناس عشان تستر فجايع الليل<br><br>وجع هد الجبال ورجع رجاك فتران وفاقد الحيل<br><br>مكلفة تدي إنتي مروة خابر كم وجايعك سيل<br><br>ها ما تندسي في حزنك<br><br>ولا ترجي المطر ينزل قبل تدي البحر إذنك<br><br>ولا قدرك غناك المر ولا بتحمل الألم التقيل وزنك<br><br>ولا بتدي الكضب أذنك<br><br>هيا حورية المطرة<br><br>هديك الدنيا واقفالك<br><br>أمانة ولوعتا وخطره<br><br>بطون الأمة بي بطرة<br><br>عليك الله القلوب الناس على الدين القويم فطره<br><br>أمرقي وبشري الأمات<br><br>زغاريد الوجع مرقن وكت شافع سعادتك مات<br><br>حريم شدر الحراز رجن الخريف بي ضحكة منلمات<br><br>وراجنك<br><br>قبل ما تفوتي كانوا الناس بموتوا محبة في حنك<br><br>هديل نسوة مدينة الروح مع امرأة العزيز جنك<br><br>بعزنك على إنك مرقتي من السعادة ضحى ومرق وجع الوطن منك<br><br>ولدتي بعد فجيعة وخوف<br><br>ظروفك ماها أي ظروف<br><br>وقف حال الزمن جريتي بيك جيب الفراغ مسروف<br><br>نهز قدرك قفاك ورضيتي يعني عشان أساك معروف<br><br>قنعتي من السمع والجتة من نبض الحنين والجوف؟<br><br>ها مالك ومال بنات الدمعة والألم البمرض الجوف<br><br>ومالك ومال خلايق راقدة في جلباب عشم مكفوف<br><br>ومالك ومال حنينك إنتي؟<br><br>ما قبال شحدنا القمرة تطلعي منها وما بنتي<br><br>مالو كنّا نحن ضحكنا لحظة وجعة ما كان بنتي<br><br>لو عمر الفرح أوجاعنا ما كان في قلوبنا سكنتي<br><br>يا حورية المطرة الهلاكك عند أجاويدك<br><br>خبارك راكزة للرمضا وهدا الضل كلو فوق إيدك<br><br>خبارك لا وجع هزاك ولا حز الزمن جيدك<br><br>ولا كحل العمى عيونك ولا انكسرن مراويدك<br><br>ولا شفعولك الرادوك وكل الدنيا بتريدك<br><br>هيا حورية المطرة!!