شعر غزل عراقي<br><br>سنورد لكم في هذا المقال بعض الأبيات الشعريّة باللهجة العراقيّة التي تتحدّث عن الغزل.<br><br>هو: اشلونچ يا أعز<br><br>النّاس عندي<br><br>هو: الكلب چم أحبيبه عنده<br><br>هي: هزني الشوك<br><br>عالموعد أتانيك<br><br>وأعد بيدي الدقايق<br><br>وحدة وحدة<br><br>وحدة اثنين<br><br>هاي الثالثة تروح<br><br>أتاني وصار هالموعد اشبعده<br><br>نمت حسبالي<br><br>أشوفك بالحلم جاي<br><br>وكلت دمعاتي أحطهن وسط خدّه<br><br>هو: نمتيه نيالچ غفيتي<br><br>وآنة ليلي يمر على<br><br>عيوني صبح<br><br>الينيَّم وردة ويمسد عليها<br><br>مو مثل ليلولي وينيم جرح!!<br><br>والغفة بكلمة محنة<br><br>مو مثل اللي ينام وبعينه ملح!!<br><br>هي: لا حبيبي<br><br>آنه هذا الليل من يمرني دمعة<br><br>وحزن وأشواك وحنين<br><br>آنه عيني عليك ما بطل دمعها<br><br>تبچي ما تسكت العين<br><br>هو: لا لا تبچين<br><br>امسحي دمعتچ<br><br>وارجوچ لا تبچين<br><br>يل دمعچ جمر<br><br>وخدودچ أحلى ورود<br><br>خايف على اخدودچ من دموع العين<br><br>لا تبچين<br><br>وردة وتحترك ما تحمل النيران<br><br>يذبل كل وركها وتستحي من الطين<br><br>هي: وانت تكلي لا تبچين ؟<br><br>مو عمري انتهى وأيّامي كلها تروح<br><br>لو راح العمر متكلّي أجيبه منين؟<br><br>هو: لا تبچين<br><br>المن بعد المن تسوه دمعة تطيح<br><br>هو ايش باقي بينّا<br><br>ونحترك كل حين<br><br>تعبنا القهر ممشى جزيرة وخوف<br><br>صار الماضي غلطة وچنة غلطانين !!<br><br>لا تبچين لو يسوه العمر يمكن بچينا اسنين<br><br>هي: اشلون اتكلي لا تبچين<br><br>هو: لا تبچين !!<br><br>هي: تدري انت اللي يحب<br><br>ما يكدر أعله النار<br><br>ويا نار اللي بيَّه أتفزز الميتين<br><br>أحتاج الدمع من ما اشوفك يوم<br><br>لأن يصبح عليَّ اليوم خمس سنين !!<br><br>حبيبي لخاطري<br><br>لا تبتعد أرجوك<br><br>ما أحمل فراكك<br><br>تدري كلش زين<br><br>هو: بس ارجوچ لا تبچين<br><br>خوفي آنه عليچ من الدمع والله<br><br>مرّات الدمع<br><br>ياخذ حلاة العين<br><br>ويل كلچ ترافه أرجوچ لا تبچين<br><br>ما أحبّك جذب صدكَني ذايب بيك<br><br>وإذا إدوّر عليه بيك تلكاني<br><br>وإذا هذا الاكَوله تظن أبالغ بيه<br><br>تكدر تنسحب بس تكدر تنساني<br><br>وما أكلك جذب كَبلك ما حبّيت<br><br>بس يوم اللي عرفتك انولدت من ثاني<br><br>وهسه أني طفل ما يعرف يضم أسرار<br><br>وتلكه البلكََلب بسرعة على لساني<br><br>أحبّك كلمة ما تستحقّه والله<br><br>لأن كلمة احبك ما تروي وجداني<br><br>وما تهمني حروف الكلمة من تنكَال<br><br>بس همني الفعل وشتحمل معاني<br><br>لأن أنا من أحب اختلف عن الناس<br><br>وما أكَلك طبع ولا سر ربّاني<br><br>ولا أكَلك ملاك أني يفلان<br><br>بس تلكه الصدك من تدك بيباني<br><br>أحبك كَالوهه كَبلي هواي<br><br>وبيه ما أهم واتركه تعاني<br><br>عندي لهفة إلك شايله من سنين<br><br>وأظن كلمة أحبك ما تطفي نيراني<br><br>ما معقول أعوفك وانا لسة أهواك<br><br>ماهو انصاف هذا وانا ما قبل<br><br>خلص كل شبابي ويّا غيرك راح<br><br>جاوينك ولك ما جيتني منول<br><br>ولو أنا اعتقد هذا الجمال البيك<br><br>من ربّك هبة وما صانعك معمل<br><br>خليلك ثقة وخلّي اكلب بيك<br><br>وتركني بمزاجي كون ما تزعل<br><br>أوصفنك وصف ما يخطر على البال<br><br>بس كون بشرط كلشي احجي تتقبّل<br><br>شعرك من تحلة ايتيه الخيال<br><br>والوادم غفت جن ليلهم جلجل<br><br>وخدودك إشارة وكف بيها السير<br><br>ورموشك سنابل عوزهن منجل<br><br>حزورة الشفايف وانحجت للناس<br><br>وما واحد كدر الهسة يلكى الحل<br><br>بياضك مو طبيعي ما حواه مخلوق<br><br>تعكس بيه الصورة اطلعك أجمل<br><br>أحط عيني اعلة صدرك ونضر المكفاك<br><br>حتّى الدم اشوفه شلون يتحول<br><br>كصّت شعرها الخلك بس مو مثل كصتك<br><br>وما شفت بين الخلك طولك ولا كصتك<br><br>جن انتا ولا انس كلي شني قصتك<br><br>عجبني طيفك معاي يبات عجبني<br><br>وكلما أروح بدرب الكاك عاجبني<br><br>تدري انت شنهو الفتني وبيك عاجبني<br><br>عاجبني كلك حلو من جدمكلكصتك