شعر حب عراقي<br><br>هذه بعض الأشعار العراقية التي قيلت في الحب<br><br>موعد حب<br><br>هو / اشلونچ يا أعز الناس عندي .. هو الگلب چم أحبيبه عنده ..<br><br>هي / هزني الشوگ عالموعد اتانيك ..<br><br>وأعد بيدي الدقايق وحده وحده ..<br><br>وحده .. اثنين .. هاي الثالثة تروح ..<br><br>اتاني وصار هالموعد اشبعده نمت حسبالي اشوفك بالحلم جاي ..<br><br>وگلت دمعاتي احطهن وسط خده<br><br>هو / نمتي .. هنيالچ غفيتي ..<br><br>وآنة ليلي يمر على عيوني صبح الينيَّم وردة ويمسد عليها..<br><br>مو مثل ليلولي وينيم جرح .. !!<br><br>والغفه ابكلمة محنه ..<br><br>مو مثل الينام وبعينه ملح ..!!<br><br>هي / لا حبيبي ..<br><br>آنه هذا الليل من يمرني دمعة..<br><br>وحزن.. واشواگ .. وحنين آنه عيني عليك ما بطل دمعها ..<br><br>تبچي ما تسكت العين ..<br><br>هو / لا .. لا تبچين ..<br><br>امسحي دمعتچ وارجوچ لا تبچين ..<br><br>يل دمعچ جمر وخدودچ احلى أورود ..<br><br>خايف على اخدودچ من دموع العين ..<br><br>لا تبچين ..<br><br>وردة وتحترك ما تحمل النيران ..<br><br>يذبل كل ورگها وتستحي من الطين ..<br><br>هي / وانت تگلي لا تبچين ..<br><br>مو عمري انتهى .. وايامي كلها أتروح ..<br><br>لو راح العمر متگلي اجيبه أمنين ..؟<br><br>هو / لا تبچين ..<br><br>المن بعد المن تسوه دمعه أتطيح ..<br><br>هو اشباقي بينا ونحترگ كل حين ..<br><br>تعبنا القهر ممشى جزيرة وخوف ..<br><br>صار الماضي غلطه وچنه غلطانين !!<br><br>لا تبچين لو يسوه العمر يمكن بچينا اسنين ..<br><br>هي / اشلون اتگلي لاتبچين ..<br><br>هو / لا تبچين ..!!<br><br>هي / تدري انت اليحب ما يگدر اعله النار ..<br><br>ويا نار اللي بيَّه أتفزز الميتين ..<br><br>احتاج الدمع من ما اشوفك يوم ..<br><br>لأن يصبح عليَّ اليوم خمس سنين ..!!<br><br>حبيبي لخاطري ..<br><br>لا تبتعد ارجوك ما احمل فراگك ..<br><br>تدري كلش زين ..<br><br>هو / بس ارجوچ لاتبچين ..<br><br>خوفي آنه عليچ من الدمع والله ..<br><br>مرات الدمع ياخذ حلاة العين ..<br><br>ويل كلچ ترافه ارجوچ لا تبچين<br><br>بَرِد تموز حبك من يمر صيف<br><br>وحر تشرين يانار اشتياقي<br><br>راقي ما شفت بس انته والله<br><br>والغيرك چِذب من گال راقي<br><br>وكافر بالعشگ ماعندي الايمان<br><br>بس بعدك نعم صار اعتناقي<br><br>واحساسي نبي من راد يهواك<br><br>كسّر كل هُبل قبل التلاقي!<br><br>يا شعري وقضيتي والمكاتيب<br><br>ياسهر الليالي واحتراقي<br><br>الك كل العمر ومقصِّر وياك<br><br>يا بيتي و محلتي وكل زقاقي<br><br>وعليك العين تعمه لو غبت يوم<br><br>ويحالي شلون لو طال الفراقي<br><br>لا تبعد عَلي ياسلوة الروح<br><br>وعهدي اوياك اسمعه واتفاقي<br><br>على هذه الگلب كثره اليمرّون<br><br>وعيونك فقط بس انته باقي<br><br>وصحيح انته حلو وهواي عشاگ<br><br>لكن يختلف عشگ العراقي<br><br>صدّگ يختلف عشگ العراقي<br><br>خربت من شفت جنحان عند الفيل .. ومن شفت النوارس صارت ذيابه<br><br>وخربت من شفت مرَّه الأسد مرعوب .. خايف ما طلع بالليل للغابه !<br><br>مجنون الزمن لو عقلي المجنون .. هذا الشفته من هو اليعرف اسبابه؟<br><br>وجبت ايدي غصب گتلهه فركي العين .. بلكي مو صدگ وينچ يا سبّابه !<br><br>تالي اتيقنت موبس حلم لا طيف .. واقع حال بس ظنوني مرتابه<br><br>شفت الناس .. بعض الناس .. غير الناس .. شفت الناس نفس الشفته بالغابه<br><br>واحد من يهد ويهد گبل بالسيف .. عاف السيف هسه وينخه بگراب<br><br>واحد مقتنع يوسف كلاه الذيب.. وتگله چذب وايگول لا يابه<br><br>واحد ما دره .. ما يعرف الي صار .. شاهد راح لمن صارت اطلابه<br><br>واحد ينسأل تعرفهه بت فلان .. جاوبهم چذب وايگول حبابه<br><br>واحد چان واحد هسه صار اثنين .. لأن وجهين عنده وغاش اصحابه<br><br>أو .. واحد ..<br><br>أو .. واحد ..<br><br>أو .. واحد ..<br><br>والاضرب بعد سألوا طفل بالعيد.. شتحب تشتري.. شنجيب لـعّابه؟<br><br>دبابه صرخ يلعب حرب وايريد ميعيّد اذا ماعنده دبابه !<br><br>وطفل ثاني شرد يرضع شوارع گام.. ويكره للأسف مدرسته وكتابه<br><br>وطفل ثالث .. وطفل رابع .. وطفل خامس ..<br><br>واخيراً<br><br>مجنون الزمن فعلاً طلع دولاب .. وبكيفه يفر لو راد دولابه ..<br><br>وبكيفه يفر لو راد دولابه