سافر الى اسطنبول بـ 300 دولار فقط كسياحة في تركيا

الكاتب: رامي -
سافر الى اسطنبول بـ 300 دولار فقط كسياحة في تركيا
"

سافر الى اسطنبول  بـ 300 دولار فقط كسياحة في تركيا

تركيا بلد أوروبية وفي نفس الوقت متقبلين الآخر لأنهم مسلمين, بلد رخيصة نسبيًا مش غالية زي أغلب المدن الأوربية. علشان كده تعتبر إسطنبول من أهم الوجهات السياحية للمصريين عموما.

السفر الى تركيا

أدخل بقى في المفيد, إزاي تسافر تركيا كشاب نفسه يحقق حلمه بالسفر في ظل ارتفاع سعر الدولار ووقف أغلب بطاقات الكريدت كارد بميزانيه لا تتعدى 300 دولار؟!.

هنفترض إنك هتسافر أسبوع كامل لـ إسطنبول من تاريخ 19 إلى 26 يناير, ركز كده معايا واقرأ الكلمتين دول.

شركات الطيران

أولا الطيران ? :

تصدق إنك ممكن تسافر من الغردقة ل إسطنبول بمبلغ 121 دولار ذهاب وعودة على طيران بيجاسوس التركي، وتنزل مطار صبيحه تاخد باص لوسط إسطنبول (تقسيم) بمبلغ 14 ليرة يعني 4,5 دولار على باص HAVATAS Shuttle.

يعني الباص هيكلفك ذهاب وعوده للمطار 9 دولار +121 تذكرة الطيران = 130 دولار ( طيران + انتقالات من وإلى المطار).

 

الفنادق في إسطنبول

ثانيا الفندق: بما إنك شاب ومسافر تتفسح مش هتقضيها قعدة في الفندق فمفيش مانع تسكن في هوستيل في إسطنبول ونتعرف على شباب وثقافات مختلفة, سعر الهوستل لمدة أسبوع 38 دولار بالضرائب واسمه sultanahmet apartments.

الرحلات السياحية في إسطنبول

رحلة جزر الأميرات

من أحلى الرحلات في إسطنبول وبتقضي فيها يوم كامل وتقدر تنفذها لوحدك بسهولة.

 

هتركب المترو إلى محطة كابتاش, هتلاقي على إيدك اليمين الميناء, هتنزل وتحجز تذكرة إلى جزر الأميرات وسعر التذكره ذهاب وعوده 7 ليرة, هتقضي بيهم رحلة من أجمل الرحلات البحرية في إسطنبول.

هتمر على 4 جزر, أهمهم أخر جزيرة بيوك ادا، هتنزل فيها تتمشى وتتصور وتقضي اليوم هناك وممكن تركب حنطور وده يكلف الفرد حوالي 15 ليرة. يعني الرحلة بالكامل هتكلفك 22 ليرة = يعني حوالي 7 دولار.

 

رحلة مضيق البوسفور

ودي من الرحلات الرائعة لاستكشاف مدينة إسطنبول من البحر, هتمر على جسر البوسفور وهتشوف قصر طوب كابي وآيا صوفيا والمسجد الأزرق, وده بتركبه من محطة أمينونو وسعر التذكرة في المركب 5 ليرة يعني 1.6 دولار.

رحلة إسطنبول القديمة

رحلة إسطنبول القديمة (المتاحف والمساجد العثمانية):

ودي في منطقة السلطان أحمد هتزور المسجد الأزرق وده مجانًا, وآيا صوفيا والتذكرة بـ 30 ليرة وممكن تزور طوب كابي والتذكرة بـ 20 ليرة وبعد كده ممكن تروح الجراند بازار أوالسوق المصري, وكل ده مجانًا بدون ولا دولار. يعني الرحلة دي كلها هتكلفك 50 ليرة = 16.5 دولار, وده لينك فيه أسعار كل متاحف إسطنبول:

رحلة بورصة

بورصة من أجمل المناطق اللي فيها مناظر طبيعية في تركيا، وتبعد عن اسطنبول حوالي 150 كيلو، ودي من الرحلات الغالية بس مش معانا يا حلو.

أرخص طريقة تروح بيها بورصة إنك تحجز من ميناء كباتاش مركب على شركة Bursa budo وسعر التذكرة 50 ليرة ذهاب وعودة, ولما توصل ميناء ميدونا تحجز باص إلى جبل أولوداغ (الجبل اللي فيه تليفريك بورصة) وسعر تذكرة الباص ذهاب وعودة 16 ليرة , وسعر تذكرة التليفريك للقمة ذهاب وعودة 30 ليرة.

يعني الرحله كلها هتكلفك 96 ليرة = 31 دولار (على فكرة رحلة بورصة الشركات السياحية بتعملها بـ 100 دولار ).

دي كده أهم رحلات إسطنبول وكده كلفتنا كلها 56 دولار.

 

التنقل في إسطنبول

بالنسبة للمواصلات هتشتري كارت اسمه اسطنبول كارد بـ 6 ليرة وتستعمله لأي عدد من الأفراد يعني ممكن تخمس فيه انت وأصحابك وده ممكن تستخدمه في المترو والأتوبيس والمركب, والتذكرة للفرد بتكون بـ 2.25 ليرة. وممكن نحط للمواصلات بالكثير 60 ليرة يعني 20 دولار تقريبا.

 

كده تكاليف رحلة إسطنبول كالآتي:

 

  • طيران على بيجاسوس بالانتقالات من وإلى المطار = 130 دولار.
  • سكن في Sultanahmet apartements لمدة أسبوع = 35 دولار
  • رحلات سياحية إجمالي = 56 دولار.
  • انتقالات ومواصلات = 20 دولار.
  • الإجمالي = 240 دولار.

يعني متبقى مبلغ 60 دولار للأكل وبعض التذكارات البسيطة.

 

 

 

"
شارك المقالة:
168 مشاهدة
هل أعجبك المقال
0
0

مواضيع ذات محتوي مطابق

التصنيفات تصفح المواضيع دليل شركات العالم
youtubbe twitter linkden facebook