قصيده رائعه للشاعر حامد زيد<br><br>(يقولون مالا يفعلون)<br><br>مابقى الا سود الايام تحرمك الرقاد<br><br>كيف الاوهام اتجرأ اتسريك مغبون<br><br>من متى تجزع من الدمع وتخاف البعاد؟<br><br>من متى تقفي بك ظنون وتجيبك ظنون؟<br><br>صرت تاخذ كذبتي صدق، ومزاحي وكاد<br><br>لو بقول اني بخونك تحسب اني بخون<br><br>ماتعرف ان كل شاعر يهيم بكل واد؟<br><br>وانهم دايم يقولون مالا يفعلون؟<br><br>ابك انا لاقلت ابنساك وانكرت الوداد<br><br>والله اني مانسيتك وولاهم يحزنون<br><br>من جزع من صفعة الشمس يطمع بالبراد<br><br>ومن فقد وجهاته الخمس يلقى بك ركون<br><br>اعتبرها هفوة انسان او كبوة جواد<br><br>لو بتسمح فانت غالي ولو تجرح تمون<br><br>عد صداتك مروة وطعناتك ضماد<br><br>خلهن لاراحن طعون ولا ردن طعون<br><br>خنجرك يستاهل الطعن ومتوني شداد<br><br>ومنك يازين الخناجر ويا بخت المتون<br><br>ردلي حنية المزح باحساس الجماد<br><br>خلنا واحد يجي صلب والثاني حنون<br><br>موت فيني واندفن فيك بثياب الحداد<br><br>وان حييت أموت لرضاك واحيا بك بهون<br><br>مره ارقد بالكفن وانت ترقد بالمهاد<br><br>ومرة ارقد بالمهد وانت ترقد بالكفون<br><br>ادري ان شجونك شجون واعنادك عناد<br><br>والبلا ان عنادك عناد وشجونك شجون<br><br>ربك اللي سخرك لي تقود وما تقاد<br><br>والله الخالق ولله في خلقه شؤون<br><br>ازرع ضلوعي من رضاك وابشر بالحصاد لعنبو من جيت ترضيه وترد امحزون<br><br>بس تسوالك بلد ؟ قول تسوالك بلاد<br><br>انت كل العالم بكون ولحالك بكون<br><br>مابعد محبتك حب ومرادك مراد<br><br>غير كونك سيد حشاي تدري من تكون ؟<br><br>نعمتين اختصوا الخلق من جود الجواد<br><br>كافل الأرزاق من حيث مالا تعلمون<br><br>البنون ونعمة المال بعيون العباد<br><br>زينة الدنيا بلا شك في كل العيون<br><br>مثل زينة دنيتي بس عندي شي زاد<br><br>من عرفتك صاروا المال وانت والبنون<br><br>انتشي بك نشوة التيه لعناق الرشاد<br><br>وافزع الك فزعة القرم لشهاب الزبون<br><br>واحصنك تحصين الأرزاق عن درب الفساد<br><br>واعشقك عشق المظاليم لفراق السجون<br><br>لو تزيد الشوق جمرة تحولني رماد<br><br>لو يزيد العشق شعرة بوصل للجنون<br><br>خل هقواتك كبيرة ونظراتك بعاد<br><br>كانك انت بكبرك تهون من اللي ما يهون ؟<br><br>ازعلك وارهن حياتي تحت رحمة زناد<br><br>تهبى لا والله الا انت والموت تهبون<br><br>عاد اذا ما ارضاك هرجي ولا اللي قلت فاد<br><br>وانت باكر بتعرف على ناس جداد<br><br>والكلام يجيك من كل شكل وكل لون<br><br>لاتحسب ان كل كلمة بتسمعها وكاد<br><br>ولا تصدق هرج شاعر وتخدعك الظنون<br><br>دايم اعرف كل شاعر يهيم بكل واد<br><br>وان هم دايم يقولون ما لا يفعلون<br><br>حتى انا اللي قلت اعشقك وما اطيق البعاد<br><br>يمكن اطلع ماعشقتك .. ولا هم يحزنون