الشاعر و الأديب المصري صلاح جاهين لديه العديد من المؤلّفات و الأشعار و منها :<br><br>احب اعيش<br><br>أحـب اعيش ولـو أعيش فـى الغابـات<br><br>أصـحى كمـا ولـدتـنى أمـى وابـات<br><br>طـائر . . حوان . . حشرة . . بشر . . بس اعيش<br><br>محـلا الحيـاة . . حتى فى هيئـة نبـات<br><br>عـجبى !!<br><br>أحسـن مـا فيهـا العشـق<br><br>أحسـن مـا فيهـا العشـق والمعشـقة<br><br>وشـويتين الضـحــك والتـريقـة<br><br>شـفت الحيـاة، لفيـت، لقيـت الألـذ<br><br>تغييـرهـا، وده يعنـى التعب والشـقا<br><br>عـجبى !!<br><br>إخطـفنى ياللى تحـبنى<br><br>إخطـفنى ياللى تحـبنى ع الحصـان<br><br>الدنيا قالت يــوم فى مـاضى الزمان<br><br>إخطـفنى ياللى تحبنــى ع الفـرس<br><br>الدنيا قالت . . قم خطـفها الشــيطان<br><br>عـجبى !!<br><br>الأرض شـوك<br><br>الأرض شـوك أيـوه لكـين هايش<br><br>والحمـرة مش يعنى الطريق حايش<br><br>دى دمنـا السـيال . وبشـرة خير<br><br>ان انتى عايشـه . وان أنا عايش<br><br>عـجبى !!<br><br>ازاى شبـ***ـا يقـوم<br><br>ازاى شبـ***ـا يقـوم ويـاخـد دوره<br><br>من غيـر صـراخ يئذيه ويجـرح زوره<br><br>يـا هلترى أحسـن لـه يقعـد سـاكت<br><br>أو ينتـرك ولـو خـرج عـن طـوره ؟<br><br>عـجبى !!<br><br>أعـرف عيـون هى الجمـال<br><br>أعـرف عيـون هى الجمـال والحسـن<br><br>واعـرف عيـون تـاخد القـلوب بالحضن<br><br>وعيون مخيفة وقـاسـية وعيـون كتيـر<br><br>وبـاحس فيهـم كـلهـم بـالحــزن<br><br>عـجبى !!<br><br>إقلـع غمـاك يـا تـور<br><br>إقلـع غمـاك يـا تـور وارفض تلـف<br><br>إكسـر تـروس السـاقيـة واشـتم وتف<br><br>قال : بس خطوة كمان . . وخطوة كمان . .<br><br>يا اوصـل نهـاية السـكة يا البير يجف<br><br>عـجبى !!<br><br>أنا شـاب<br><br>أنا شـاب لـكن عمـرى ولا ألف عـام<br><br>وحيـد ولـكن بين ضـلوعـى زحـام<br><br>خـايف ولـكن خـوفـى مـنى أنـا<br><br>أخـرس ولـكن قـلبـى مـليـان كـلام<br><br>عـجبى !!<br><br>أنا كـل يـوم أسـمع<br><br>أنا كـل يـوم أسـمع . . فلان عذبوه<br><br>أسـرح فـى بغـداد والجزاير واتوه<br><br>مـا اعجبش م اللى يطيق بجسمه العـذاب<br><br>واعـجـب مـن اللى يـطـيق يعذب أخوه<br><br>عـجبى !!<br><br>أنا قـلبى كان شخشيخة<br><br>أنا قـلبى كان شخشيخة أصـبح جـرس<br><br>جلجلت بـه صـحيوا الخـدم والحـرس<br><br>أنـا المـهرج . . قمتو ليـه خفتو ليـه<br><br>لاف إيدى سـيف ولا تحت مـنى فـرس<br><br>عـجبى !!<br><br>انـا الذى عشـت الزمن<br><br>انـا الذى عشـت الزمن مضـيعة<br><br>بـروح حـزينة معـفنة مضعضعه<br><br>زرعت شـجرة سـنط لجل انجرح<br><br>لقيتهـا شـعر البنت ومفـرعـه<br><br>عـجبى !!<br><br>انا الذى عمـرى اشـتياق<br><br>انا الذى عمـرى اشـتياق فى اشـتياق<br><br>وقطـر داخـل فـى محطـة فــراق<br><br>قصـدت نبـع السـم وشـربت سـم<br><br>مـن كتر شـوقى وعشـمى فى الترياق<br><br>عـجبى !!<br><br>أنا اللى بالأمـر<br><br>أنا اللى بالأمــر المحــال اغتـوى<br><br>شـفت القمـر نطـيت لفوق فى الهوا<br><br>طـلته مـا طـلتوش إيه انـا يهمنـى<br><br>وليـه … ما دام بالنشـوة قلبـى ارتوى<br><br>عـجبى !!<br><br>أنـا إلـه الـوجــد<br><br>أنـا إلـه الـوجــد رب الـهيــام<br><br>أضـرب بسـهم الوهـم وهــم الغـرام<br><br>وهــم الغــرام مـن كتر مـا هو لذيذ<br><br>رشـقت انـا ف صـدرى جمـيع السـهام<br><br>عـجبى !!<br><br>أنا قلبـى كـورة<br><br>أنا قلبـى كـورة . . والفـراودة أكـم<br><br>يـامـا اتنطـح وانشـاط .. وياما اتعكم<br><br>واقـول له كـل ح ينتهى فى المعـاد<br><br>يقـول بسـاعتك ؟ والا سـاعة الحكم ؟<br><br>عـجبى !!<br><br>أنا قلبى كـوكب<br><br>أنا قلبى كـوكب وانطلق فى المـدار<br><br>حواليـكى يا محـبوبتى يا نور ونار<br><br>يلف مـهمـا يـلف مـابيكـتفيش<br><br>وتمـللى نصـه ليل ونصـه نـهار<br><br>عـجبى !!<br><br>أنا قلت كلمـة<br><br>أنا قلت كلمـة وكان لهـا مـعنيين<br><br>كمـا بطـن واحـده وتـوأمين زيـن<br><br>وشـينلو دنيا شـر . . التوأم الخير يموت<br><br>لو دنيا خير . . الشـر ح يعيش مـنين ؟<br><br>عـجبى !!<br><br>أنا كانلـى أب<br><br>أنا كانلـى أب . وكـان رئيس محكمة<br><br>سـتين سـنة . فى قضية واحدة اترمى<br><br>سـتين سـنة وطـلع بـراءة وخـرج<br><br>يشـكى الحياة والمـوت لـرب السـما<br><br>عـجبى !!<br><br>أنـا كنت شـىء<br><br>أنـا كنت شـىء وصـبحت شىء ثم شىء<br><br>شـوف ربـنـا . . قـادر علـى كـل شىء<br><br>هـز الشـجر شـواشيـه ووشـوشنى قال :<br><br>لابد مـا يمـوت شـىء عشـان يحيا شىء<br><br>عـجبى !!<br><br>إنسـان<br><br>إنسـان أيـا إنسـان مـا أجـهـلك<br><br>مـا أتفهـك فى الكـون ومـا أضـألـك<br><br>شمس وقـمـر وسـدوم ومـلايين نجـوم<br><br>وفـاكرهـا يـا مـوهـوم مخلوقـه لـك ؟<br><br>عـجبى !!<br><br>إنشـد يـا قلبـى<br><br>إنشـد يـا قلبـى غنــوتك للجـمـال<br><br>وارقص فى صـدرى من اليمين للشـمال<br><br>مـا هـوش بعيـد تفضـل لبكره سـعيد<br><br>ده كـل يـوم فيـه ألف ألف احتمـال<br><br>عـجبى !!<br><br>آه لـو أنا ومحبـوبى<br><br>آه لـو أنا ومحبـوبى جـزنا الفضـى<br><br>فـى سـفينة وحـدينا . . وأشـيا رضا<br><br>سـاعة صـفا تعجبنـا نرجـع لـهـا<br><br>والهـم قبـل ما ييجى … يبقى مضى<br><br>عـجبى !!<br><br>أهوى الهـوى<br><br>أهوى الهـوى وهمس الهوى فى العيـون<br><br>وبسـمة المغـرم . ودمـعـه الحنــون<br><br>وزلــزلات الحــب نهــد الصــبا<br><br>اكـون أنـا المــحبوب . أو لا أكـون<br><br>عـجبى !!<br><br>أوصـيك يا إبنـى<br><br>أوصـيك يا إبنـى بالقمــر والزهـور<br><br>أوصـيلك بـليل القاهـرة المســحور<br><br>وإن جـيت فى بالك .. إشـترى عقـد فل<br><br>لأى سـمرا … وقبـرى إوعـك تـزور<br><br>عـجبى !!<br><br>اوقـات<br><br>اوقـات افـوق ويحــل عنـى غبـايا<br><br>واشـعر كأنى فـهمت كـل الخبـايـا<br><br>وافتـح شـفايفى عشــان أقـول الدرر<br><br>مـا أقـولش غير حبة غزل فى الصبايا<br><br>عـجبى !!<br><br>إيـديا فـى جيوبـى<br><br>إيـديا فـى جيوبـى وقلبـى طـرب<br><br>سـارح فى غربة بس مش مـغترب<br><br>وحـدى لكـين ونسـان وماشـى كده<br><br>وبـابتعد … ما اعرفش … أو باقترب<br><br>عـجبى !!<br><br>إيش تـطلبى يـا نفسـى<br><br>إيش تـطلبى يـا نفسـى فـوق كـل ده<br><br>حظــك بيضــحك وانـتى متنكـدة<br><br>ردت قـالت لـى النفس : قـول للبشـر<br><br>مـا يبصـوليش بعيـون حـزينـة كـده<br><br>عـجبى !!<br><br>إيه اللى خدتـه<br><br>إيه اللى خدتـه من مرور السـنين<br><br>يا قلبـى الا دمـعتك والأنـيـن<br><br>بتئن وبتفــرح وترجــع تحــن<br><br>مـع إن مـش كل البشر فرحـانين<br><br>عـجبى !!